ezio brugali blog

LE ESTATI IN VIA MANZONI       

- parol da Busnagh -

Serum quej dala periferia

nûmm da la via Manzoni dal 27 in sû ; 

serum fioeu tropp viscur

nûmm da la leva dal ‘67 in giö.

Gh’era inscì tant vèrd da calpestà;   

gh’eran i sciréss cun curacc da gratà!...

e i squadri sa duvevan sempar furmà

per riturnà a cà strac, la sira, vincitur o perdent. 

A ma cuntàvan sû di bandi dala piassa,

là, in funt, tra i cà e i bar e la gèsa:

in di cùrt del centro s’eran furmà,

sull’eroom, cunt i gioeùgh , sa davan battaja.

Ma nûmm se stava in di pràa a curr adrée ai farfaj;

e gh’eran sempar chi benedett sciréss a fa curr l’acqua in buca!

Opur gh’a se dava i pesciat al balon in di camp del culécc ,

o sa pedalava tucc insema fin al Campo Robinson.

Me ripetevan “L’Italia la va màl, besogna risparmià!”  ; 

e se patinava tucc insema sû e giö da via Manzoni,

in di domènegh sensa machina a rebatton dul su,   

in di domènegh d’un temp luntan ch’el fu.  

Ta regordi inscì, cara mia vegia strada,

perché dabon trovi pù ‘l vert da calpestà!

E 'ntant ca viagien tropp macchen anc'adess,   

cunt al pass pedigh ripercuri i to stori de cuntà.